Іс-шараға KAZENERGY қауымдастығының, «Экономикалық зерттеулер институты» АҚ, «ECOJER» қауымдастығының және мұнай-газ компанияларының өкілдері қатысты.
Өткен жылы ақпанда бекітілген Стратегия парниктік газдың нөлдік шығарындылары бойынша өршіл мақсаттарды белгілейді және елді көміртексіздендіру үшін қажетті негізгі технологиялық өзгерістерді анықтайды.
Стратегияның мақсаттары мен қағидаттарын орындаудың нақты қадамдары биылғы жылы әзірлене бастаған Жол картасында айқындалады. Жол картасы парниктік газдар шығарындылары бойынша сауда квоталарының тиімді жүйесін құру, «жасыл» қаржыландыру, кәсіпорындар мен ғимараттардың энергия тиімділігін арттыру, өнеркәсіптік процестерді көміртексіздендіру мәселелерін қамтиды, сондай-ақ елдің бүкіл экономикасы бойынша төмен көміртекті саясат шараларын анықтайды.
Қазіргі уақытта түрлі бағыттар бойынша 18 кіші топқа бөлінген Жол картасын әзірлеу бойынша Жұмыс тобы құрылды. Мұнай-газ саласының төмен көміртекті даму ерекшеліктерінің мәселелері «Мұнай мен газды өндіру және қайта өңдеу» кіші тобында, сондай-ақ Қазақстанның «Global Methane Pledge» бастамасына қосылуын есепке алып, «Метан шығарындыларын азайту» кіші тобында қарастырылады.
-Мұнай-газ саласы Қазақстан экономикасының негізгі саласы болып табылады және оған Стратегияның мақсаттарына жетуге үлкен үміт артылады. Сонымен қатар көміртексіздендіру технологиялары компаниялардан қосымша инвестицияларды, сондай-ақ қазіргі бизнес үлгілерін қайта құрылымдауды талап етеді. Осыған байланысты ел мен мұнай-газ саласының мүдделерін есепке алу теңгерімін сақтай отырып, көміртегі бейтараптығына қол жеткізуге көмектесетін нақты іс-шараларды қосу бойынша практикалық ұсынымдар мен ұсыныстарды кешенді әзірлеу қажет, - деді «KAZENERGY» қауымдастығының Бас директоры Әлібек Қуантыров.
